Улстөр
・Нийтэлсэн:
Мэргэн охин
・
2017 03 сар 07
・ 11
Н.Батбаяр, УИХ-ын гишүүн асан Б.Гарамгайбаатар нарыг Хөгжлийн банкны хэрэгт холбогдуулан өнгөрсөн сард АТГ-аас цагдан хориод байсан билээ. Тэднийг хууль бусаар тендер авч, улсын мөнгө завшсан гэх хэрэгт буруутгасан. Ингээд Б.Гарамгайбаатарыг үргэлжлүүлэн хорих эсэхийг шийдэх шүүх хурал Сүхбаатар дүүргийн эрүүгийн хэргийн анхан шатны шүүхэд болж, шүүхээс түүнийг суллаж, гадуур байцаах шийдвэр гаргасан юм байна. Нийслэлийн Прокуророос Б.Гарамгайбаатарыг эрүүл мэндийн шалтгааны улмаас суллах санал гаргасан ажээ.
Хэргийг тодруулбал, Б.Гарамгайбаатарын хувьд Халзан бүргэдэй, Солонготын давааны чиглэлийн замын гүйцэтгэл 38 орчим хувьтай байхад тухайн газарт дахин шинээр зам тавих нэрийдлээр Хөгжлийн банкнаас нийт 43.6 тэрбум төгрөг гаргуулж аваад хүүгийнхээ нэр дээр байдаг “Монроуд” компанид шилжүүлж өгсөн хэрэгт буруутгагдаж буй. Энэ хэрэгтэй холбогдуулан түүний хүү "Монроуд" компанийн захирал Г.Тэнгис, тус компанийн нягтлан бодогч Б.Гарамгайбаатарын төрсөн дүү Б.Оюунцэцэг нарыг шалгаж эхэлсэн билээ.
Харин Н.Батбаярын хувьд Эрүүгийн хуулийн тусгай ангийн 263 дугаар зүйлийн 263.2, 264 дүгээр зүйлийн 264.2, 150 дугаар зүйлийн 150.3-т зааснаар сэжигтнээр тооцон шалгаж байгаа. Түүнийг суллах эсэхийг шийдэх шүүх хурал өнөөдөр болно. Прокурорын зүгээс түүнийг үргэлжлүүлэн хорих саналыг ирүүлсэн байна.
Г.Нар
Манай сайт танд таалагдаж байвал LIKE хийгээрэй. Танд баярлалаа.