Улстөр
・Нийтэлсэн:
Мэргэн охин
・
2017 05 сар 05
・ 23
УИХ-д суудалтай гурван нам Ерөхийлөгчийн сонгуульд өрсөлдөх хүнээ тодруулчихлаа. МАН-ын намаас намын дарга М.Энхболд, харин АН-аас УИХ-ын гишүүн асан Х.Баттулга нар нэр дэвшинэ. Гэтэл МАХН-аас намын дарга Н.Энхбаярыг Ерөнхийлөгчийн сонгуульд сойх шийдвэр гаргачихжээ. МАХН-ын бага хурлаар нэлээд хэдэн хүн Ерөнхийлөгчийн сонгуульд нэр дэвшинэ гэсэн мэдээлэл гарч байсан. Тодруулбал, УИХ-ын гишүүн С.Ганбаатар, Академич, Хууль зүйн шинжлэх ухааны доктор, профессор, Шинжлэх ухааны гавьяат зүтгэлтэн С.Нарангэрэл, УИХ-ын гишүүн асан Ц.Оюунбаатар, Гадаад харилцааны сайд асан Л.Эрдэнэчулуун нарын нэр яригдаж байсан ч тэдний эцсийн хувилбар нь намын дарга Намбарын Энхбаяр болжээ.
Хамгийн гол нь Н.Энхбаярын ард санхүүжүүлэгчид гэх нөхөд байх магадлал маш өндөр. Улстөрчдийг санхүүжүүлэгчид байж гэмээнэ тэд хөдөлж чаддаг гэдэг нь л тодорхой юм. Н.Энхбаярын хүмүүс гэгддэг “Элсний 13”-ынхнаас эхлээд, түүний дэмжлэгтэйгээр хөл дээрээ боссон, хөл алдаж унахаас аврагдсан олон хүний нэрс өнөөдөр ч санхүүжүүлэгчид хэмээн олны дунд яригдсаар байдаг.Су.Батболд, Б.Чойжилсүрэн, Д.Одбаяр, Д.Тэрбишдагва, Д.Арвин, Байгаль орчны сайд асан У.Барсболд, Байгаль орчны сайд асан Г.Шийлэгдамба, Боловсролын сайд асан Н.Болормаа, “Хадгаламж” банкны Ц.Чимэдцэрэн, Үйлдвэр худалдааны дэд сайд асан Д.Сүрэнхор нарын хэн нь өнөөдөр түүн рүү тусламжийн гараа сунгаж байгаа бол.
МАН-ын хүн гэгддэг атлаа МАХН-ынханд сэтгэлээ өгсөн “Гацуурт”-ын Л.Чинбат, “Петровис”-ын Ж.Оюунгэрэл нарын нэрс хүртэл сонсогддог.
Уг нь Н.Энхбаярын ялтайд тооцох хугацаа дуусаагүй байгаа учраас боломжгүй гэдэг хариуг Сүхбаатар дүүргээс гаргасан байгаа. Мөн О.Баасанхүү гишүүн ярилцлага өгөхдөө “Манай намын дарга Н.Энхбаярт ямар нэг шалтаг гаргаж ирээд дарамт шахалт учруулахыг үгүйсгэх аргагүй. Энэ тохиолдолд вариант бий” хэмээн ярилцлага өгч байсан.
МАХН-ын дэд дарга Ц.Шаравдорж хэлэхдээ " МАХН Н.Энхбаяр даргыгаа нэр дэвшүүлнэ. Өнөөгийн дагаж мөрдөж байгаа Монгол Улсын бүх хуулиар Н.Энхбаяр гэдэг хүн ял шийтгэлгүй гэдэг нь тодорхой байгаа. Үүнийг зарим улс төрийн хүчин, хуульчид хэлж байгаа шүү дээ. Жишээ нь, АН-ын гишүүн, Хууль зүй, дотоод хэргийн сайд асан Х.Тэмүүжин болон Монгол Улсын гавьяат хуульч Б.Цэрэнбалтав энэ хүнд ял шийтгэл байхгүй гэж хэлсэн. Зөвхөн энэ хүмүүсийн ярьснаар ч биш өнөөгийн дагаж мөрдөж байгаа Монгол Улсын бүх хуулиар ял, шийтгэл байхгүй байгаа. Иймээс Н.Энхбаяр дарга нэр дэвших бүхий л нөхцлийг хангаж байгаа. Энэ удаагийн Монгол Улсын Ерөнхийлөгчийн сонгуульд бүх улс төрийн хүчин хамгийн шилдэг нэр дэвшигчээ тодруулж, өрсөлдөх байх." хэмээсэн хэлсэн. Тус намын энэхүү шийдвэрийг хуулийн байгууллага хэрхэн шийдвэрлэхийг харах л үлдлээ. Нэмэлт мэдээлэл дуулгахад Н.Энхбаярын ялтай тооцох хугацаа 2017 оны наймдугаар сард дуусах тухай мэдээллийг хуулийн байгууллагаас өгсөн билээ.
Г.Нар
Манай сайт танд таалагдаж байвал LIKE хийгээрэй. Танд баярлалаа.