Солонгос улсын Сөүл хотод өчигдөр "Дэлхийн усны форум 2015" хэлэлцүүлгийн нээлт боллоо.
Дэлхийн 170-н орны зочид төлөөлөгчид долоо дахь удаагийн энэхүү форумаар улс орнуудад тохиолдож буй усны хомсдол, нөөц, усыг зөв зохистой хэрэглэх асуудлаар харилцан туршлага солилцох юм.
Хэлэлцүүлэгийн тайзнаа Солонгос улсын Ерөнхийлегч Пак Гын Хе долоон орны төлөөлөгчдийн хамт гарч, ёслолын олсыг татсан байна.
Төлөөлөгчид олсноос татмагц тусгайлан бэлдсэн 2 метр өндөртэй төхөөрөмжөөс ус гоожих ёстой байтал харамсалтай нь уг төхөөрөмж нуран унажээ. Энэ үед хамгаалалтын албаны ажилтнууд тайзан дээр яаран гарч, аюулгүй байдлыг шалгасан бөгөөд дэлхийн олон орны төлөөлөгчид оролцсон уг арга хэмжээний үеэр ийм бүтэлгүй явдал тохиолдсонд Солонгосчууд ихэд дургүйцэж байгаагаа олон нийтийн сүлжээгээр илэрхийлсээр байна.
"Дэлхийн усны форум 2015" хэлэлцүүлгийг зохион байгуулах хорооны ажилтнууд иргэдээс уучлалт гуйн, төхөөрөмж нуран унасаны шалтгааныг тодруулж, холбогдох ажилтанд хариуцлага тооцохоо мэдэгджээ.
Эх сурвалж:mglradio.com