Олон улсын зах зээлд гаргах байсан Мазаалай бонд Ерөнхий сайдыг огцруулах Г.Уянга нарын гишүүдийн улстөржилтөөс болж хойшлоод байсан. Мөн олон улсын зах зээлийн орчин тухайн үед хэлбэлзэлтэй байсан учраас хойшлуулсан билээ. Тэгвэл энэхүү бондыг амжилттай гаргажээ.

Худалдан авагчдаас 780 сая ам.долларын бонд худалдан авах захиалга ирсэн бөгөөд эдгээр худалдан авагчдийн дийлэнхи нь Чингис бонд гэх зэрэг Монголын засгийн газрын өмнө гаргасан бондыг эзэмшигчид байгаа юм.

Нийт 500 сая ам.долларыг таван жилийн хугацаатай, 10.875 хувийн хүүтэй татан төвлөрүүлсэн нь Чингис бондын хүүнээс нэмэгдсэн үзүүлэлт аж.

Чингис бондыг 4.125 хувийн хүүтэй олон улсын зах зээлд босгож байсан билээ. Хүүгийн зардал нэмэгдэхэд Монголын төлбөрийн тэнцэл муудсан, гадаад өрийн нийт хэмжээ, валютын нөөцийн хомсдол нөлөөлжжэ. Энэхүү бондын талаар Монголбанкны Ерөнхийлөгч Н.Золжаргал “Сая Засгийн газар 250 сая ам.долларыг оруулж ирлээ, мөн дахин 500 сая ам.долларын зээл авах шийдвэр нь гарсан. Гадаад зах зээлийн хэлэлцлүүд нь хийгдчихсэн байна.

Тэгэхээр энэ сардаа нэлээн эерэг блансууд гарах байх. Ялангуяа энэ жил оны төгсгөлд төлбөрийн тэнцэл дээрээ эерэг дүнтэй гаргахыг зорьж байгаа. Тэгэхээр төлбөрийн тэнцэл дээр эерэг, ирэх жилийн төсвөө тэнцвэртэй баталж чадвал цаашдаа инфляци бага байхад эерэг нөлөө үзүүлнэ” хэмээн ярьжээ.