Дэлхий
・Нийтэлсэн:
Мэргэн охин
・
2017 01 сар 02
・ 4
Нью-Йорк хотын төв гудамжинд байрлах АНУ-ын шинэхэн ерөнхийлөгч, тэрбумтан бизнесмэн Дональд Трампын “Трамп Тауэр” нь Манхэттаны хамгийн үнэ цэнэтэй байршилд байрласан, алдартай цамхгуудын нэг юм. 1984 онд ашиглалтад орсон 58 давхар бүхий энэ барилга Нью-Йоркийн Тавдугаар өргөн чөлөөний 56, 57-р гудамжийг дамнан байрладаг.
1979 онд Трамп “Genesco” компаниас 11 давхар барилга худалдан авч, тус хотод оффис, худалдааны төв, орон сууцтай хамгийн анхны тансаг зэрэглэлийн үл хөдлөх хөрөнгийг байгуулах зорилго тавьжээ. Тэрээр өөрийн төсөөллийг бодитоор хэрэгжүүлэх эрхэм үүргийг нэрт архитектор Дер Скатаар хариуцуулжээ. Шилэн фасадтай атлаа доод давхруудын гадна хэсэгт ногоон байгууламж бүхий террас шийдэх, тэдгээрийг халхалсан шилэн хөшиг бүхий хана хийх асуудлыг маш чадварлаг гүйцэтгэжээ.
Худалдааны хэсэгт зориулан таван давхрыг засч тохижуулсан бөгөөд зүүн хэсгийн хананы дагуу буюу урсдаг шат хоорондын зайд 18 метрийн өндөртэй хүрхрээ байгуулсан нь онцгой тансаг орчныг бүрдүүлж өгчээ. Энэ хэсэг ашиглалтад орсон даруйд эндхийн дэлгүүр, галлерей, зоогийн газрууд Нью-Йоркийн хамгийн онцгой газруудын нэг болж чадсан байдаг.
Алдарт “Трамп Тауэр”-ийн 30-аас 58 дахь давхарт хамгийн тансаг орон сууц, пентхаусууд байрладаг. Шалнаас тааз хүртэл үргэлжлэх цэлгэр том цонхоор нь Манхэттаны төв хэсэг, Төв цэцэрлэгт хүрээлэнг толидон харах боломжтой юм. Тиймээс ч энд дэлхийд алдартай, баян чинээлэг хүмүүс хошуурах болж, үл хөдлөх хөрөнгийн үнэ цэнийг асар хурдацтай нэмэгдүүлжээ.
2004 онд “Apprentice” телевизийн цувралаар тус цамхагийн уулзалт, хүлээн авалтын танхимууд гээд хүмүүсийн мэддэггүй олон хэсгийг харуулсан нь “Трамп Тауэр”-ийн нэр хүндийг улам өндөрт мандуулсан гэж хэлж болно. Өдгөө энэ цамхаг ноён Трампын нэрийг дэлхийд таниулсан гол нэрийн хуудас нь болоод байна.
Энэхүү тансаг, гоёмсог цамхагийнхаа 58 дугаар давхарт нь ноён Трамп гэр бүлийн хамт амьдарч, 26 дугаар давхарт нь оффисоо байрлуулжээ. Түүний пентхаусыг хэрэв худалдвал 80 сая фунт стерлинг буюу 100 сая ам.доллар хүрэх юм. Тэрээр Францын Версалийн ордны дотор заслаас санаа аван гэрээ тохижуулсан байдаг.
Тэрбумтны гэрт зочлогсдыг алмаазан чимэглэлтэй, хоёр том алтан хаалга угтана. Гурван давхрыг дамнан байрлах энэ гэрийн интерьерийн алтлаг, хул шаргал, ягаан, улаан зэрэг завсрын дулаан өнгөнүүдээс бүрдсэн байдаг. Гэрийн засал чимэглэл нь гоёмсог хээ хуар, мушгирсан хэлбэр бүхий тавилга, алтан бүрмэл гээд XVIII зууны үеийн Францын хуучны хэв маягийг гүн шингээсэн учраас бүхэлдээ тансаг байдлыг илэрхийлнэ.
58 дахь давхраас Нью-Йорк хотын таван дүүрэг, Төв цэцэрлэгт хүрээлэн, хөрш Нью Жерси хотын дүр зураг бүхэлдээ харагддаг нь гайхалтай.
Трампын гэрийн нэгэн чухал хэсэг бол яах аргагүй гэр бүлийн зурагнууд нь байдаг. Палм Бич эрэгт гэргийтэйгээ авахуулсан хуримын зургууд, тэдний 10 настай хүү Барроны зургууд гэрийн нэлээд хэдэн хэсэгт бий. Мөн XIV Людовик хааны мушгираа хөлтэй, зуувин түшлэгтэй, тансаг дэртэй, тохой тавих тухлаг тулгууртай сандал нь энэ гэрийн бас нэгэн онцлох чимэг аж.
Манай сайт танд таалагдаж байвал LIKE хийгээрэй. Танд баярлалаа.