Улстөр
・Нийтэлсэн:
Отгонхүү
・
2018 11 сар 29
・ 6
УИХ-ын Тамгын газрын Ерөнхий нарийн бичгийн дарга Ц.Цолмон, УИХ-ын даргын Хууль зүйн бодлогын зөвлөх Р.Болд нар цаг үеийн асуудлаар мэдээлэл хийлээ.
Л.Оюун-Эрдэнэ гишүүн өнөөдөр мэдээлэл хийх үедээ “УИХ-ын дарга М.Энхболд гэр бүлийн гишүүдийг нь баривчилна хэмээн гишүүдийг дарамталж байна. Засгийн газрыг огцруулахгүй гэсэн кноп дарвал гэмт хэрэгт гүтгэнэ хэмэн сүрдүүлж байгаа” хэмээсэн. Үүнтэй холбогдуулан УИХ-ын дарга М.Энхболд Монгол Улсын Ерөнхий прокурор болон ТЕГ, АТГ, ЦЕГ-т албан бичиг хүргүүлснийг Хууль зүйн бодлогын зөвлөх Р.Болд танилцууллаа.
Уг албан бичигт УИХ-ын гишүүн Л.Оюун-Эрдэнэ “МАНАН-гийн гэх бүлэглэлийн тоглоом нурах гээд байгаа тул хууль, хяналтын байгууллагууд М.Энхболдыг хамгаалахаар ажиллаж байна. УИХ-ын гишүүдийн гэр бүлийг баривчлах ажиллагаа явуулж, гишүүдийг дуудаж, Засгийн газрыг хамгаалбал хэрэгт холбогдуулж шалгана гэсэн мэдэгдэл хийсэн. Дээрх мэдэгдэл үнэн эсэх, УИХ-ын гишүүдийн гэр бүлийг баривчлах ажиллагаа явуулсан эсэх талаар шалгаж, хариу ирүүлнэ үү. Мөн олон нийтэд илтэд буруу мэдээлэл хүрсэн бол залруулж, албан ёсны мэдэгдэл хийнэ үү” хэмээжээ.
Мөн үеэр УИХ-ын Тамгын газрын Ерөнхий нарийн бичгийн дарга Ц.Цолмон, “УИХ-ын чуулганы өнөөдрийн хуралдаан эхлэх үед С.Бямбацогт гишүүний хүсэлтийн дагуу Ёс зүйн дэд хороог хуралдуулахаар түр завсарласан. Уг дэд хорооны хуралдаан дууссаны дараа УИХ-ын чуулганы хуралдаан хэвийн үргэлжилнэ” гэлээ.
Мэдээллийн дараа сэтгүүлчид сонирхсон асуултадаа хариулт авав.
-УИХ-ын дарга албан тушаалаа хүлээлгэн өгөх хүсэлт гаргасан гэсэн мэдээлэл байна?
-УИХ-ын дарга өргөдлөө өгөөгүй.
-УИХ-ын дарга чуулгандаа орж ирэх үү?
-УИХ-ын дарга Ёс зүйн дэд хорооны гишүүнээр ажилладаг. Одоо тус дэд хорооны ирц бүрдэж, хуралдахыг хүлээж байна.
Манай сайт танд таалагдаж байвал LIKE хийгээрэй. Танд баярлалаа.