ОБЕГ: Цасан шуурга шуурч, хүйтэрнэ

Нийгэм ・Нийтэлсэн: Отгонхүү 2017 12 сар 27

Онцгой байдлын ерөнхий газраас Цаг уур орчны шинжилгээний газартай хамтран цаг үеийн асуудлаар өнөөдөр хэвлэлийн бага хурал  зохион байгууллаа.

 Хэвлэлийн бага хуралд Улсын онцгой комиссын нарийн бичгийн дарга, хурандаа М.Энх-Амар, Гамшгийн шуурхай удирдлагын газрын дарга, хурандаа Б.Мандахгэрэл, Гамшгаас урьдчилан сэргийлэх газрын дарга, хурандаа Д.Батсайхан, Цаг уур, орчны шинжилгээний газрын Урьдчилан мэдээлэх хэлтсийн дарга Л.Оюунжаргал нар оролцлоо.

 

                                                 Цасан шуурга шуурч, хүйтэрнэ

 Цаг уур, орчны шинжилгээний газрын мэдээллээр, арванхоёрдугаар сарын 28-ний өдөр баруун аймгуудын нутаг, төвийн аймгуудын нутгийн баруун хэсгээр, 29-нд төв болон зүүн аймгуудын нутаг, говийн аймгуудын нутгийн зүүн хэсгээр, 30-нд төвийн аймгуудын нутгийн зүүн, зүүн аймгуудын нутгийн зарим газраар, 31-нд баруун аймгуудын нутгаар, 2018 оны нэгдүгээр сарын  1, 2-нд зарим газраар цас орж,  цасан шуурга шуурах төлөвтэй байна. Иймд малчин иргэд шуурганд төөрөх, малтайгаа уруудах, осгох, амь насаа алдах зэрэг эрсдэлээс урьдчилан сэргийлж, хүүхдийг хараа хяналтгүй орхихгүй байх, малын бэлчээрлэлтэд онцгойлон анхаарах шаардлагатай байна. Мөн хүчтэй цасан шуурганы үеэр үзэгдэх орчин хязгаарлагдаж,  автозам, даваа цасанд хаагдан халтиргаа гулгаа үүссэний улмаас тээврийн хэрэгсэл саатах, бөөгнөрөл үүсэх зэрэг хүндрэл гардаг.  Тиймээс жолооч нар хүчтэй салхи шуурганы үед замд гарахгүй байх, зайлшгүй шаардлагатай тохиолдолд хол, ойрын замд гарахдаа тээврийн хэрэгслийн найдвартай байдлыг хангаж бензин, шатахууны нөөцтэй, дулаан хувцастай зорчихыг  анхаарууллаа.

                               Нийт нутгийн 40 гаруй хувьд цастай байна

   Манай орны нийт нутаг дэвсгэрийн 40 гаруй хувьд цастай байгаагаас Булган аймгийн Баяннуур, Бугат, Бүрэгхангай, Гурванбулаг, Дашинчилэн, Рашаант сум, Завхан аймгийн Сонгино сум, Орхон аймгийн Баян-Өндөр, Жаргалант сум, Өвөрхангай аймгийн Бүрд, Есөнзүйл сум, Сэлэнгэ аймгийн Баруунбүрэн, Орхонтуул сум, Төв аймгийн Баян-Өнжүүл, Лүн сум 21-35 см /6 аймгийн 15 сум/, Баян-Өлгий аймгийн Сагсай сум, Булган аймгийн Могод, Сэлэнгэ, Хишиг-Өндөр сум, Дорнод аймгийн Халхгол сум, Завхан аймгийн Баянтэс, Баянхайрхан, Тосонцэнгэл, Түдэвтэй, Тэс, Цэцэн-Уул сум, Сүхбаатар аймгийн Асгат, Мөнххаан, Сүхбаатар сум, Сэлэнгэ аймгийн Ерөө сум, Төв аймгийн Бүрэн, Жаргалант, Цээл сум, Увс аймгийн Баруунтуруун, Малчин, Тариалан, Хяргас сум, Хэнтий аймгийн Өндөрхаан, Мөрөн сумын нутгаар 11-20 см (9 аймгийн 24 сум) зузаан цастай байна.

 Шинэ жилийн баяраар аюулгүй байдлыг хангах хамтарсан шалгалт үргэлжилж байна

  Шинэ жилийн баяртай холбогдуулан Онцгой байдлын байгууллагаас Нийслэлийн Засаг даргын захирамж, нийслэлийн Онцгой байдлын газар, Улаанбаатар хотын цагдаагийн газар, Нийслэлийн Мэргэжлийн хяналтын газрын даргын хамтарсан удирдамжийн хүрээнд нийслэлийн нутаг дэвсгэрт байршилтай шинэ жилийн баяр тэмдэглэх, хүлээн авалт зохион байгуулах байгууллага, аж ахуйн нэгж, иргэдийн барилга байгууламжид гамшгаас хамгаалах болон гал түймрийн улсын хяналтыг хэрэгжүүлэх  шалгалтыг зохион байгуулж байна.

Одоогоор шалгалтыг 88 объект хийж, 346 зөрчил илрүүлэн, 74 зөрчлийг газар дээр нь арилгуулж, бусад зөрчлүүдийг арилгуулах талаар албан шаардлагыг  56 байгууллагад хүргүүлэн ажиллаж байна.  

Иргэд пиротехникийн хэрэгслийг зөвшөөрөлгүй газраас худалдан авч, улмаар салют буудуулах, сүлд модыг чимэглэхдээ мэргэжлийн бус хүнээр дур мэдэн хийлгэдгээс болж бэртэж гэмтэх тохиолдол байдаг Иймд иргэн та  пиротехникийн хэрэгслийг тусгай зөвшөөрөлтэй газраас худалдан авч, хэрэглэх заавар, санамжийг мөрдөх, сүлд модоо 12 вольтын хүчдэлтэй зориулалтын гэрлэн чимэглэлээр чимж, цахилгааны утасны холболтыг дүрмийн дагуу хийх, цагаан бенгалын галыг хялбар шатах материалын ойролцоо цацруулахгүй байх, цацарч дууссаны дараа цаас, хөвөн зэрэг шатамхай зүйл дээр хаяхгүй байх, оргилуурт гэрэл, тэсрэх бодист динамикийг орон байр, тасалгаанд, сүлд модны ойролцоо, шатах материалтай орчинд хэрэглэхгүй байх, аж ахуйн нэгж байгууллага  сүлд мод, гэрлэн чимэглэлийг дүрмийн дагуу угсарч ашиглах, тухайн обьектыг харуул хамгаалалтын сонор сэрэмжийг сайжруулж ажиллахыг  анхаарууллаа


Манай сайт танд таалагдаж байвал LIKE хийгээрэй. Танд баярлалаа.


Сэтгэгдэл үлдээх