Сурагчдын амралтыг сунгахгүй гэв

Нийгэм ・Нийтэлсэн: Отгонхүү 2020 01 сар 05 ・ 1

Нийслэлийн ЕБС-ийн сурагчдын хоёрдугаар улирлын амралт арванхоёрдугаар сарын 23-наас эхэлж нэгдүгээр сарын 13-ныг хүртэл буюу 21 хоног үргэлжилнэ.

Харин орон нутгийн сурагчдын амралт арванхоёрдугаар сарын 30-наас 2020 оны нэгдүгээр сарын 10-ныг хүртэл 14 хоног үргэлжлэх юм. Хавар мал төллөх үеэр орон нутгийн сурагчдыг нийслэлийн сурагчдаас нэг долоо хоногоор илүү буюу 14 хоног амраах төлөвлөгөөтэйгөөр ийнхүү зөрүүлж амрааж байгаа юм.

Тэгвэл нийслэлд томуу, томуу төст өвчний тархалт 10 гаруй хувьтай байгаатай холбоотойгоор сурагчдын амралтыг долоо хоногоор сунгах хүсэлтийг Эрүүл мэндийн яамнаас Боловсрол, соёл, шинжлэх ухаан, спортын яаманд хүргүүлсэн билээ.

Энэ талаар Боловсрол, соёл, шинжлэх ухаан, спортын сайд Ё.Баатарбилэгээс сэтгүүлчид тодруулахад тэрбээр “Эрүүл мэндийн яамнаас сурагчдын амралтыг сунгах хүсэлт ирсэн. Томуу, төст өвчин амбулаторийн үзлэгийн 15 хувьд хүрвэл сурагчдын амралтыг хойшлуулах зохицуулалттай. Одоогоор 10 гаруй хувьтай байгаа юм билээ. Бид нийслэлийн Эрүүл мэндийн газраас дахин мэдээлэл авна. Одоо сурагчдын хоёрдугаар улирлын амралт үргэлжилж байна. Амралт долоо хоногийн дараа дуусна. Энэ хугацаанд нөхцөл байдал өөрчлөгдөх эсэхийг харна. Ер нь сурагчдын амралтыг сунгахгүй, хичээллэх хугацааг тогтвортой байлгах байр суурьтай байгаа. Өнгөрсөн жилүүдэд хоёр сараар сурагчдыг амрааж байсан. Өнгөрсөн жил л гэхэд Элсэлтийн ерөнхий шалгалт эхэлчихсэн байхад сургуулийн хүүхдүүд амраагүй байсан. Ийм хүндрэлүүд гардаг учраас хичээллэх хугацааг тогтвортой байлгах нь чухал” гэлээ.


Манай сайт танд таалагдаж байвал LIKE хийгээрэй. Танд баярлалаа.


Сэтгэгдэл үлдээх

1 Сэтгэгдэлтэй
Сэтгэгдэлүүд харагдах байдал: